Леанід Улашчанка

заслужаны артыст Рэспублікі Беларусь
Артыст, вядучы майстар сцэны

Заслужаны артыст Рэспублікі Беларусь (з 1997 г.), вядучы майстар сцэны Леанід Аляксандравіч Улашчанка працуе ў Беларускім рэспубліканскім тэатры юнага гледача з 1965 года.

Скончыў Беларускі дзяржаўны тэатральна-мастацкі інстытут (цяпер – Беларуская дзяржаўная акадэмія мастацтваў).

У тэатры сыграў больш за сто роляў, многія з якіх сталі дасягненнем беларускага сцэнічнага мастацтва і высока адзначаны крытыкай, тэатральнай грамадскасцю, гледачамі.

Сярод лепшых – Міця (”З любімымі не расставайцеся“ А.Валодзіна – работа, якая высока адзначана самім аўтарам п’есы), Д’Артаньян (”Тры мушкецёры“ М.Рэхельса паводле Дзюма-бацькі), Фелікс Дзяржынскі (”Юнацтва рыцара“ В.Зуба), Лёшка (”Мядовы месяц“ К.Губарэвіча), Раман (”Сіні снег“ Я.Шабана), Герцаг Арсіна (”Дванаццатая ноч“ У.Шэкспіра), Кальман (”Зелёная птушка“ К.Гоцы), Ільдэфонс (”Нечаканыя госці“ Е.Нізюрскага), Гарэцкі (”Ваўкі і авечкі“ А.Астроўскага), Вядучы (”Чаму ж мне не пець, чаму ж не гудзець... “ М.Чарота і Янкі Купалы), Соцкі (”Прымакі“ Янкі Купалы), Кручкоў (”Пінская шляхта“ В.Дуніна-Марцінкевіча), Дзед Астап (”Міколка-Паравоз“), Канстанцін Заслонаў (”Паядынак“ М.Матукоўскага), Капітан Келер (”Стваральніца цуду“ У.Гібсана), Дзед (”Казачны домік“ М.Стэгліка), Цар (”Царэўна-жабка“), Каралевіч Елісей і Багатыр (”Пушкінскія казкі“), Чынчарака (”Чынчраквела“ Г.Нахуцрышвілі), Кароль-бацька і Мэр (”Голы кароль“ Я.Шварца), Пень (”Анчутка“ Б.Мятальнікава), Мартаўн (”Маленькі лорд Фаунтлярой“ Н.Воранава паводле Ф.Бернэт), Кот Васіль (”Палёт у Краіну Мрояў“ М.Варфаламеева), Леў (”Дарога на Віфлеем“ С.Кавалёва), Чараўнік Мэрлін (”Рыцар Ордэна Сонца“ П.Васючэнкі), Барон, Дон Гуан, Старшыня (”Маленькія трагедыі“ А.Пушкіна ), Асянін (”А зоры тут ціхія…“ Б. Васільева), Дросельмаер (”Шчаўкунчык“ Э.Т.А.Гофмана), Клоун Клаўс (”Пацалунак ночы“ С.Кавалёва), Эзоп (”Ліса і вінаград“ Г. Фігейрэду), Арцімон Кукіш (”Пан міністар“ Ф.Аляхновіча), пан Карыта (”Беларускія вадэвілі“  братоў Далецкіх і М.Чарота).

Вызначаецца адметнай характарнасцю, пластыкай, высокай культурай выканання. З’яўляецца настаўнікам, чый вопыт пераймаюць маладыя артысты тэатра.

Шмат разоў адзначаўся  граматамі ЦК ЛКСМБ, граматамі і прэміямі Міністэрства культуры Рэспублікі Беларусь, Упраўлення культуры Мінскага абласнога выканаўчага камітэта, дыпломамі фестываляў і аглядаў,  дыпломамі і ўзнагародамі Саюза тэатральных дзеячаў Беларусі, а таксама медалём ”За доблесную працу“ у гонар 100-годдзя з дня нараджэння В.І.Леніна і нагрудным знакам ”За ўклад у развіццё культуры Беларусі“ (2003 г.)

Актыўна здымаецца ў кіно і на тэлебачанні,  плённа працуе на радыё. Пятнаццаць гадоў запар веў цыкл перадач ”Алёнчыны гульні“ у вобразе дзеда Барадзеда. У фонд Беларускага радыё занесены тры цыклавыя перадачы, у якіх Л.А.Улашчанка быў аўтарам, рэжысёрам і выканаўцам: ”Казкі дзядзечкі Рымуса“ паводле твораў Д.Харыса, ”Хлопчык з вялікай Місісіпі“ М.Мейюна і ”Казачныя літары“.

Артыст вядомы як драматург,  перакладчык (”Казка пра Папа і яго работніка Балду“ Аляксандра Пушкіна для Тэатра юнага гледача  ў 1989 годзе; ”Царэўна-жабка“ Валерыя Ткачука для Тэатра юнага гледача  ў 2012 годзе і інш.) і пісьменнік (найбольш значныя зборнікі апавяданняў казак для дзяцей ”Як верабейка сябра шукаў“ (2004 г.), ”Хто галоўны“ (2014 г.), ”Ножкі сараканожкі“ (2016 г.),  удзельнік хрэстаматыйнага зборніка ”Птушка шчасця“). Пераклаў на беларускую мову ”Фядорына гора“ К.Чукоўскага, ”Кошчын дом“ С.Маршака.

У бягучым рэпертуары выконвае ролі Льва (”Дарога на Віфлеем“ С.Кавалёва), дзядулі Ціля (”Сіняя птушка“ М.Метэрлінка), пана Карыты (”Беларускія вадэвілі“  братоў Далецкіх і М.Чарота).

 

 

 

Спектаклi ў Тэатры юнага гледача

Асобы тэатра