Пасланне да Сусветнага дня тэатра 2010
Аўтар – Дама Джудзі Дэнч
Міжнародны дзень тэатра – гэта нагода звярнуццца да тэатра ва ўсёй шматстайнасці яго формаў.
Тэатр – крыніца забавы і натхнення. Ён валодае ўласцівасцю аб'ядноўваць мноства разнастайных культураў і народаў, якія існуюць у свеце. Але тэатр ёсць штосьці большае, ён адчыняе таксама магчымасці для навучання і інфармавання.
Тэатр паказваюць ва ўсім свеце і не заўсёды ў традыцыйным тэатральным асяроддзі. Імпрэзы могуць ладзіцца у невялічкай вёсачцы ў Афрыцы, дзесьці зусім блізка да падножжа горнай вяршыні ў Арменіі, на маленечкай выспе ў Ціхім акіяне. Тэатру толькі трэба, каб была прастора і глядач.
Тэатр валодае здольнасцю прымусіць нас усміхнуцца, або заплакаць, а яшчэ ён павінен прымушаць нас думаць і разважаць.
Тэатр ладзіцца намаганнямі і працай каманды. Акторы – гэта тыя, хто на відавоку, але існуе яшчэ і надзвычайная група людзей, якіх не бачыць глядач. Яны гэтаксама важны, як акторы, а іх творчая індывідуальнасць і прафесійныя здольнасці забяспечваюць жыццё пастаноўцы. І яны па праве мусяць падзяляць любы поспех і трыўмф, на якія ў любым выпадку мімаволі ўскладваюцца надзеі.
27 сакавіка – гэта заўжды афіцыйны Сусветны дзень тэатра. Па многіх прычынах кожны дзень мусіць разглядацца як дзень тэатра, паколькі перад намі заўжды стаіць абавязак працягваць традыцыю забаўляць, адукоўваць і прасвятляць нашага гледача, без якога мы не здолеем існаваць.
Адкуль пайшоў Сусветны дзень тэатра?
Міжнародны інстытут тэатра – арганізацыя, што існуе пад эгідай ЮНЕСКА – у 1961 годзе ўпершыню абвясціла 27 сакавіка Сусветным днём тэатра. Да гэтай даты сусветная тэатральная супольнасць ладзіць разнастайныя мерапрыемствы, але галоўнае з іх – гэта штогадовае пасланне да дня тэатра, у якім асоба сусветнага значэння выказвае свае погляды наконт тэатральнага мастацтва і пытання міру на зямлі. Першым аўтарам такога паслання ў 1962 годзе стаў культавы французскі творца Жан Както. У розныя часы гэтыя пасланні пісалі Лоўрэнс Аліўе, Пітэр Брук, Дзмітры Шастаковіч, Рычард Бёртан, Эжэн Іанэска, Кірыл Лаўроў ды інш. У 2010 годзе сваё пасланне міжнароднай супольнасці накіравала Джудзі Дэнч, брытанская тэатральная і кіна- акторка, уладальніца "Оскара", Дама-Камандор Ордэна Брытанскай Імперыі, найперш вядомая айчыннаму гледачу як выканаўца ролі М – суворай начальніцы Джэймса Бонда ў апошніх серыях вядомай кінаэпапеі.
Калі зазірнуць глыбей у гісторыю...
Феспід
... то мы пабачым, што дзень 27 сакавіка мае нашмат больш старажытныя карані. Справа ў тым, што прыблізна ў гэты час у Афінах у 534 г. да н.э. упершыню была зладжана афіцыйна тэатральная імпрэза. Так афінскі тыран Пісістрат вырашыў адзначыць свята бога Дыяніса, і з таго часу драматычныя спаборніцтвы сталі ў Атыцы штогадовымі. Першым іх пераможцам быў легендарны Феспід, які доўгі час лічыўся і першым акторам, і першым драматургам, і заснавальнікам жанру трагедыі. Менавіта ён поруч з хорам увёў у драматычную імпрэзу актора-дэкламатара. Дух Феспіда да нашага часу не дае спакою тэатралам, умешваецца ў іх працу, садзейнічаючы ці перашкаджаючы поспеху пастаноўкі.
http://www.world-theatre-day.org/ - сайт Сусветнага дня тэатра
(люты)
,
распрацавана ў 
, інтэрнэт прадстаўлены 